தமிழறியாமல் பராசக்தி வசனம் பேசிய பண்டரிபாய்!

கன்னடத் திரைப்பட உலகின் முதற் கதாநாயகியாகக் கருதப்படும் பண்டரிபாய் கன்னடம், தெலுங்கு, தமிழ் ஆகிய தென்னிந்திய மொழிகளில் 1000 திரைப்படங்களுக்கு மேல் நடித்துள்ளார்.

‘தேன்மொழியாள்’ பண்டரிபாய் 14 வயதில் நடிக்கத் தொடங்கினார். சிவாஜிகணேசனின் முதல் படமான பராசக்தியில் அவருக்கு ஜோடியாக நடித்தவர் என்ற பெருமைக்குரியவர் பண்டரிபாய்.

பிறகு அவருக்கு தங்கையாக, அக்காவாக, அண்ணியாக, அம்மாவாகவும் நடித்தார்.

தேசிய அளவில் மொத்தம் 7 மொழிகளில் 1500-க்கும் மேற்பட்ட படங்களில் நடித்து சாதனை படைத்தார். பண்டரிபாயின் சொந்த ஊர் கர்நாடக மாநிலத்தில் உள்ள பத்கல் என்ற கிராமம்.

1930-ம் ஆண்டு நவம்பர் மாதத்தில் பிறந்தார். தந்தை ரங்காராவ். தாயார் காவேரிபாய். பண்டரிபாயுடன் உடன் பிறந்தவர்கள் 9 பேர்.

பண்டரிபாயின் தந்தை ஓவிய ஆசிரியர் என்றாலும் நாடகத்தின் மீது அபார மோகம். எனவே, வேலையை விட்டு விலகி, நாடகக் கம்பனி ஆரம்பித்தார்.

எனினும் தன் மகள்கள் யாரும் நாடகத்தில் நடிக்கக் கூடாது என்பதில் உறுதி கொண்டிருந்தார். நாடகம் பற்றிச் பேசக் கூடாது என்று தடை போட்டிருந்தார்.

நாடகத்துக்கு பதிலாக, மகள்களுக்குக் கதாகாலட்சேபம் கற்றுக் கொடுத்தார். பண்டரிபாய் தன் 10 வயதிலேயே கன்னடத்திலும், மராத்தியிலும் கதாகாலட்சேபம் செய்யக் கூடிய ஆற்றலைப் பெற்றார்.

“இவ்வளவு சிறப்பாக காலட்சேபம் செய்கிற பண்டரிபாய் சினிமாவில் நடித்தால் எவ்வளவு நன்றாக இருக்கும்?” என்று அவரது அண்ணன் நினைத்தார்.

அவர் முயற்சியால் ‘வாணி’ என்ற கன்னடப் படத்தில் ஒரு சிறு வேடத்தில் நடிக்கும் வாய்ப்பு பண்டரிபாய்க்கு கிடைத்தது.

அடித்து எம்.கே.தியாகராஜ பாகவதர் நடித்த ‘ஹரிதாஸ்’ என்ற மெகாஹிட் படத்தில் பண்டரிபாய்க்கு ஒரு சிறு வேடம் கிடைத்தது. தமிழில் அது தான் அவருக்கு முதல் படம்.

படத்தின் முதல் காட்சியில் “வாழ்விலோர் திருநாள்” என்று பாடிக் கொண்டே குதிரையில் வருவார் பாகவதர். பெண்களைத் துரத்துவார். ஒரு ஊஞ்சலில் ஆடிக்கொண்டிருக்கும் பண்டரிபாயை விரட்டிக் கொண்டு போவார்.

அவரை துயில் உரிய முயற்சிப்பார். பிறகு ஒரு மோதிரத்தை பரிசளிப்பார். இந்தக் காட்சியில் பண்டரிபாய் நடித்தார். அப்போது அவருக்கு வயது 14 தான்.

பிறகு ஏ.வி.எம். தயாரித்த “வேதாள உலகம்” என்ற படத்தில் காளியாகத் தோன்றினார். பிறகு, வைஜயந்தி மாலா கதாநாயகியாக அறிமுகமான ‘வாழ்க்கை’ படத்தில் இரண்டாவது கதாநாயகியாக பண்டரிபாய் நடிப்பதாக இருந்தது.

ஆனால், தமிழில் சரிவர பேச வராததால் அந்த வேடத்தில் டி.கே.எஸ். நாடகக் குழுவைச் சேர்ந்த எம்.எஸ்.திரவுபதி நடித்தார்.

“வாழ்க்கை” படம் “ஜீவிதம்” என்ற பெயரில் தெலுங்கில் தயாரிக்கப்பட்ட போது இரண்டாவது கதாநாயகியாக நடித்தார்.

பண்டரிபாய்க்கு தமிழ் கற்றுக் கொடுக்க பி.டி.சம்பந்தம் என்ற நடிகரை ஏ.வி.எம். நிறுவனம் ஏற்பாடு செய்தது.

என்றாலும் பண்டரிபாயிடம் இருந்து தமிழ் வார்த்தை தெலுங்கில் தான் வந்தது. பி.டி.சம்பந்தம் பண்டரிபாயிடமிருந்து தெலுங்கை கற்றுக்கொண்டது தான் மிச்சம். பின்னர் சகஸ்ரநாமத்திடம் தமிழ் கற்றார்.

விரைவிலேயே தமிழில் அழகாக வசனம் பேச பண்டரிபாய் கற்றுக் கொண்டார். ஏ வி. எம். கூட்டுறவுடன் நேஷனல் பிக்சர்ஸ் 1952 இல் தயாரித்த பராசக்தி படத்தில், சிவாஜியின் ஜோடியாக பண்டரிபாய் நடித்தார்.

சின்ன வேடங்களில் நடித்த படங்களை ஒதுக்கி விட்டுப் பார்த்தால் பண்டரிபாய் முக்கிய வேடத்தில் நடித்த முதல் தமிழ்ப் படம் பராசக்தி தான்.

அதில் சிறப்பாக நடித்ததுடன் கலைஞரின் வசனங்களை தெளிவாகவும், இனிமையாகவும் பேசி தேன்மொழியாள் என்று போற்றப்பட்டார்.

தொடர்ந்து சிவாஜி கணேசனுடன் பல படங்களில் பண்டரிபாய் நடித்தார். “கண்கள்” படத்தில் தங்கை, “திரும்பிப் பார்” படத்தில் அக்காள், “அந்தநாள்” படத்தில் மனைவி… இப்படி மாறுபட்ட கதாபாத்திரங்களில் நடித்தார்.

பண்டரிபாய் நடித்த தமிழ்த் திரைப்படங்கள்

பராசக்தி, எங்க வீட்டுப் பிள்ளை, ஸ்ரீ ராகவேந்திரா, மனிதன், நீலாவுக்கு நெறஞ்ச மனசு, வீர பாண்டியன்,  நம் குழந்தை, காத்திருந்த கண்கள், வேதாள உலகம், குடியிருந்த கோயில், இரும்புத்திரை, காவல் பூனைகள், நாலு வேலி நிலம், பாவை விளக்கு, செல்லப்பிள்ளை,

அர்த்தமுள்ள ஆசைகள், ராகங்கள் மாறுவதில்லை, மனைவியே மனிதனின் மாணிக்கம், கெட்டிமேளம், குறவஞ்சி, பதில் சொல்வாள் பத்ரகாளி, மாணவன், கண்கள், மகாலட்சுமி, வாழப்பிறந்தவள், குலதெய்வம், மனோகரா, பக்த சபரி.

• நன்றி: சினிமா ப்ளஸ் இதழ்