மெலடிப் பாடல்களால் மெஸ்மரிசம் செய்த சின்மயி!

தமிழ் சினிமா பின்னணிப் பாடகிகளில் சின்மயிக்கு தனித்துவமான இடம் உண்டு.

மும்பையில் பிறந்த அவர், இசை ஆய்வாளரான தனது தாய் பத்மஹாசினியிடம் கர்நாடக இசை மற்றும் இந்துஸ்தானி செவ்வியல் இசையை கற்றார். பின்னர் அவரது குடும்பம் சென்னைக்கு குடிபெயர்ந்தது.

11 வயதில் கர்நாடக இசையில் இளம் திறமையாளர்களுக்கான கலாசாரத் திறனாய்வுக்கான கல்வி உதவித்தொகைத் திட்டத்தின் (CCRT) மூலம் உதவித்தொகையும், 2000ஆம் ஆண்டில் கஜல் பாடல்களுக்காக அகில இந்திய வானொலியின் தங்கப் பதக்கம், 2002ஆம் ஆண்டு இந்துஸ்தானி செவ்வியல் இசைக்காக வெள்ளிப் பதக்கம் உள்ளிட்ட பல்வேறு பதக்கங்களை திரைத்துறைக்கு வருவதற்கு முன்னரே பெற்றுள்ளார் சின்மயி.

சின்மயியின் முதல் பாடல்

தனியார் தொலைக்காட்சியில் நடைபெற்ற பாடல் போட்டியில் பங்கேற்று வெற்றி பெற்றதைத் தொடர்ந்து, பாடகர் ஸ்ரீனிவாஸ் அவரை இசையமைப்பாளர் ஏ.ஆர்.ரஹ்மானுக்கு அறிமுகப்படுத்தினார்.

மணிரத்னம் இயக்கத்தில் உருவான ‘கன்னத்தில் முத்தமிட்டால்’ படத்தில் ‘ஒரு தெய்வம் தந்த பூவே’ பாடல் மூலம் திரைத்துறையில் அறிமுகமானார் சின்மயி.

‘மங்கள் பாண்டே தி ரைசிங் ‘ திரைப்படத்தில் ‘ஹோலி ரே’ பாடலின் மூலம் பாலிவுட்டில் கால் பதித்தார்.

‘குரு’ திரைப்படத்தில் இடம் பெற்ற ‘தேரே பினா’ மற்றும் ‘மய்யா’ ஆகிய பாடல்கள் அவரது திரைபயணத்தில் ஒரு மைல்கல்லாக அமைந்தது.

இளையராஜா, ஏ.ஆர்.ரகுமான், தேவா, வித்யாசாகர், யுவன் ஷங்கர் ராஜா, ஹாரிஸ் ஜெயராஜ், டி.இமான், ஜிப்ரான், ஜி.வி.பிரகாஷ், அனிருத் உள்ளிட்ட பல முன்னணி இசையமைப்பாளர்கள் இசையில் பாடியுள்ளார் சின்மயி.

தமிழ் மொழியில் ஏராளமான பாடல்களை பாடியுள்ள சின்மயி, தெலுங்கு, கன்னடம், மலையாளம், துளு, இந்தி உள்ளிட்ட 8-க்கும் மேற்பட்ட மொழிகளில் ஆயிரத்துக்கும் அதிகமான பாடல்களை பாடியிருக்கிறார்.

கடந்த 2018ஆம் ஆண்டில் பிரேம்குமார் இயக்கத்தில் விஜய் சேதுபதி, திரிஷா நடிப்பில் வெளியான ’96’ திரைப்படத்தில் இடம்பெற்ற அனைத்து பாடல்களையும் சின்மயியையே பாட வைத்தார் இசையமைப்பாளர் கோவிந்த் வசந்தா.

பல மொழிகளில் தடம் பதித்த பாடகராக அறியப்பட்ட சின்மயி, பிரபல டப்பிங் கலைஞரும் கூட. நயன்தாரா, திரிஷா, சமந்தா, பூமிகா, சமீரா ரெட்டி, தமன்னா, நீதுசந்திரா, எமி ஜாக்சன், காஜல் அகர்வால், டாப்ஸி உட்பட பல நடிகைகளுக்கு குரல் கொடுத்துள்ளார்.

சின்மயி பாடியதில் சமீபத்தில் பிரபலமான பாடல்களில் ஒன்று மணிரத்னம் இயக்கத்தில் கமல்ஹாசன், சிம்பு, திரிஷா நடித்த தக்லைஃப் படத்தின் ‘முத்தமழை’ பாடல்.

அந்த பாடலை அவர் தமிழ் படத்தில் பாடவில்லை, மாறாக இந்தியில் பாடியிருந்தார். மேலும், இசை வெளியீட்டு விழாவில் தமிழ் பாடலை அவர் ரசித்து பாடியது பெரும் கவனம் பெற்றது.

தமிழில் சின்மயி பாடிய பாடல்களில் பிரபலமான சில பாடல்கள்

1) தெய்வம் தந்த பூவே

மணிரத்னம் இயக்கத்தில் உருவான கன்னத்தில் முத்தமிட்டால் படத்தில் இடம் பெற்ற பாடல். அம்மா, மகளின் பாசப் பிணைப்பை வெளிப்படுத்துவதாக இருந்தாலும், பின்னணியில் போர்க்களம், வலி, பிரிவு என பல உருக்கமான பின்னணியை உள்ளடக்கிய பாடலாக இருந்தது.

2) சந்திப்போமோ இருவரும் சந்திப்போமோ?

‘எனக்கு 20 உனக்கு 18’ படத்தில் சின்மயி பாடிய பாடல். ஏ.ஆர்.ரஹ்மான் இசையில், இளமை உற்சாகத்துடன் கூடிய வரிகளை எழுதியிருந்தார் பா.விஜய்.

காதலனை காதலி தேடுகிற பாணியில் பாடல் அமைந்திக்கும். இன்றைக்கும் பலரும் அதிகம் முணுமுணுக்கப்படும் பாடலாக உள்ளது.

3) சரசர சாரகாத்து

ஜிப்ரான் இசையில் வாகை சூட வா படத்தில் இடம்பெற்றது இந்தப் பாடல். ஒரு கிராமத்து பெண்ணின் குறும்பையும் அவளது காதலையும் சொல்லும் இந்தப் பாடலை அதற்கான பாவனைகளில் சிறப்பாக பாடியிருப்பார் சின்மயி.

கிராமத்து பாணியில் அவர் பாடிய இந்தப் பாடல் அவர் பாடிய பாடல்களில் தனித்து விளங்குகின்றது.

4) சஹானா சாரல் தூவுதோ

ஷங்கர் இயக்கத்தில் ரஜினிகாந்த், ஷ்ரேயா நடித்த சிவாஜி திரைப்படத்தில் இடம்பெற்ற அழகியல் நிறைந்த பிரமாண்ட பாடலாக உருவானது.

இந்தப் பாடலில் சின்மயியின் குரலும் பாடல் காட்சிகள் உருவான விதமும் இரண்டும் பிரமிக்க வைத்திருக்கும். தனக்கே உரிய பாணியில் இந்தப் பாடலை காட்சிப்படுத்தியிருப்பார் இயக்குநர் ஷங்கர்.

5) மைய்யா, மைய்யா

குரு படத்தில் ஏ.ஆர்.ரஹ்மான் இசையில் உருவான பாடல். இந்தப் பாடலுக்கு மல்லிகா ஷெராவத் நடனமாடியிருப்பார்.

பாடலின் இடையிடையே வசனங்கள் வருவதும் பின்னர் பாடல்கள் தொடர்வதும் என இந்த பாடல் இளைஞர்களை அதிகம் கவர்ந்த பாடலாக அமைந்திருக்கும்.

6) சின்னம்மா சிலுக்கம்மா

சக்கரக்கட்டி படத்தில் இடம்பெற்ற இந்தப் பாடலுக்கு ஏ.ஆர்.ரஹ்மான் இசையமைத்திருப்பார். பென்னி தயாளுடன் இணைந்து பாடியிருப்பார் சின்மயி. அந்த தெலுங்கு வார்த்தை ஹம்மிங், புல்லாங்குழல் இசை ஆகியவை பாடலுக்கு பெரும் வரவேற்பை பெற்றுத்தந்தது.

7) காதலே காதலே

கடந்த 10 ஆண்டுகளில் சின்மயி குரலில் வந்த சிறந்த காதல் பாடல்களில் ஒன்றாக இன்றும் பலரால் முணுமுணுக்கப்படும் பாடல்களில் ஒன்று.

பிரேம்குமார் இயக்கிய 96 திரைப்படத்தில், கோவிந்த் வசந்தா இசையில் சின்மயி பாடிய இந்தக் காதல் பாடல், காதலர்கள் மட்டுமல்லாது பலரையும் கவர்ந்தது. கார்த்திக் நேத்தா வரிகளும், அதற்கேற்ற காட்சியமைப்பும் ரசிகர்களுக்கு விருந்தாகின.

8) ஆருயிரே மன்னிப்பாயா

இயக்குநர் மணிரத்னம், இசையமைப்பாளர் ஏ.ஆர்.ரகுமான் கூட்டணியில் உருவான குரு படத்தில் இடம்பெற்றது இந்தப் பாடல். ஐஸ்வர்யா ராய் நடித்திருப்பார். இந்தப் பாடலில் அவரது குரல் சிறிது நேரம் வந்தாலும், அத்தனை ரசிகர்கள் மத்தியில் ரசிக்க வைத்தது.

9) இதயத்தில் ஏதோ ஒன்று

அஜித், அனுஷ்கா நடித்த என்னை அறிந்தால் படத்தில் பலரையும் கவர்ந்திழுத்த இந்தப் பாடல் இசையமைப்பாளர் ஹாரிஸ் ஜெயராஜ், பாடலாசிரியர் தாமரை, சின்மயி கலந்த கூட்டணியில் உருவானது.

10) அன்பில் அவன்

கௌதம் மேனன் இயக்கத்தில் விண்ணைத் தாண்டி வருவாயா படத்தில் வரும் இந்த பாடல் வரிகளை யாராலும் வெறுக்க முடியாது. காட்சியமைப்பும், சிம்பு, திரிஷா நடனமும், ஏ.ஆர்.ரகுமான் இசையும் இளைஞர்களை கொண்டாட வைத்தது.

– நன்றி: பிபிசி