பரத் நடிப்பில், 2019 ஆம் ஆண்டில் வெளியாகி விமர்சன ரீதியாகவும், வசூல் ரீதியாகவும் வெற்றியைப் பெற்ற ‘காளிதாஸ்’ படத்தைத் தொடர்ந்து அதன் இயக்குநரான ஸ்ரீ செந்தில் இயக்கத்தில் உருவாகியுள்ள படம் ‘காளிதாஸ் 2’.
இந்தப் படத்தில் பரத், அஜய் கார்த்திக், பிரகாஷ் ராஜ், ‘ஆடுகளம்’ கிஷோர், சுரேஷ் மேனன், ஆனந்த் நாக், பவானி ஸ்ரீ, அபர்னதி, ராஜா ரவீந்தர், டி எம் கார்த்திக், ‘சிங்கம்’ ஜெயவேல் உள்ளிட்ட பலர் நடித்திருக்கிறார்கள்.
இவர்களுடன் ‘பூவே உனக்காக’ படத்தின் மூலம் ரசிகர்களிடம் பிரபலமான நடிகை சங்கீதா இப்படத்தில் முக்கியமான வேடத்தில் நடித்திருப்பதன் மூலம் தமிழ் சினிமாவிற்கு ரீ என்ட்ரி ஆகியிருக்கிறார்.
சுரேஷ் பாலா ஒளிப்பதிவு செய்திருக்கும் இந்தத் திரைப்படத்திற்கு சாம் சி. எஸ். இசையமைத்திருக்கிறார்.
படத்தொகுப்புப் பணிகளை புவன் ஸ்ரீனிவாசன் கவனிக்க, கலை இயக்கத்தை துரைராஜ் கையாள, நிர்வாக தயாரிப்பு பணியை எஸ். பழனியப்பன் மேற்கொண்டுள்ளார்.
கிரைம் திரில்லராகத் தயாராகி இருக்கும் இந்தத் திரைப்படத்தை பிரபல விநியோகஸ்தரும் ,தயாரிப்பாளருமான ஃபைவ் ஸ்டார் செந்தில், அவரின் சொந்தப் படத் தயாரிப்பு நிறுவனமான ஸ்கை பிக்சர்ஸ் நிறுவனம் சார்பில் தயாரித்திருக்கிறார்.
இப்படத்தின் ஃபர்ஸ்ட் லுக் வெளியாகி பெரும் வரவேற்பை பெற்ற நிலையில், அண்மையில் இப்படத்தின் டீசரும் வெளியிடப்பட்டிருக்கிறது.
தமிழ்த் திரையுலகின் முன்னணி நட்சத்திர நடிகரான ரவி மோகன், இசையமைப்பாளரும் நடிகருமான ஜீ.வி. பிரகாஷ் குமார் ஆகியோர் இணைந்து அவர்களது சமூக வலைதளப் பக்கத்தில் வெளியிட்டு, படக் குழுவினருக்கு வாழ்த்து தெரிவித்தனர்.
டீசரில் இடம் பிடித்திருக்கும் காட்சிகளும், மயக்கும் பின்னணி இசையும் ரசிகர்களை வெகுவாக கவர்ந்திருக்கிறது. அத்துடன் படத்தைப் பற்றிய எதிர்பார்ப்பும் அதிகரித்திருக்கிறது.